मामाचं पत्र हरवलंय की
पत्र लिहिणारा मामाचं हरवलाय ?
एक काहीतरी नक्कीच हरवलंय !
कोंबड्याचं आरवण थांबलंय की
ती सकाळ व्हायचीच थांबलीय ?
एक काहीतरी नक्कीच थांबलय !
पाटीवर अभ्यास लिहायचा राहिलाय
की आमची पाटी कोरीच राहिलीय ?
एक काहीतरी नक्कीच राहिलंय !
मऊ वरण-भात करपलाय
की आमची जीभच करपलीय ?
एक काहीतरी नक्कीच करपलय !
संवाद कमी झालाय
की विसंवाद वाढलाय ?
एक काहीतरी नक्कीच झालंय
आमचं वय वाढलंय
की आमच्यातलं अंतर वाढलंय ?
एक काहीतरी नक्कीच वाढलंय
शुभं करोति म्हणायचं विसरलोय
की शुभ म्हणजे काय तेच विसरलोय ?
एक काहीतरी नक्कीच विसरलोय !
अनामिक
No comments:
Post a Comment